Премиум Конкрит нь 2011 онд байгуулагдсан бөгөөд Монгол улсын уул уурхай, эрчим хүч, дэд бүтцийн салбарын барилга, инженерингийн төслүүдэд гадаргуу болон гүний уурхайн зориулалттай энгийн болон шүршдэг бетон, төрөл бүрийн буталсан чулуу, элс, химийн бодис, материал нийлүүлэхээс гадна төслийн менежмент, барилга угсралт, цахилгаан, сантехник болон дулааны хангамж, зураг төсөл, зөвлөгөө, судалгаа зэрэг үйл ажиллагаагаараа оролцож мэргэжлийн төслийн удирдлага болон инженерингийн үйлчилгээ үзүүлдэг.

Премиум Конкрит ХХК нь өөрийн чанарын бодлогыг бүх сонирхогч талууддаа нээлттэй байлгах бөгөөд уг бодлогоо 2019.08.26-ний өдөр Гүйцэтгэх захирлын 19/332 тоот тушаалаар баталсан

Премиум Конкрит компани нь гадны ижил төстэй үйлдвэрлэгчид, бетон үйлдвэрлэлийн салбарын мэргэжилтэнгүүдтэй хамтран шинийг эрэлхийлсэн судалгаа, шинжилгээ хийх, хөгжүүлэлтийн үйл ажиллагааг байнга дэмжиж ажилладаг.

Бид бүтээгдэхүүний эрдэм шинжилгээ, судалгаа, технологийн шинэчлэлийн эрэл хайгуул, ажилтнуудаа тогтмол сургах, байгууллага өөрөө суралцах талаар байнга идэвхитэй үйл ажиллагаа явуулж ирсэн билээ. Америкийн Бетоны Институтийн гишүүн болж салбарын шинэ мэдээ мэдээллийг байнга авч, хурал семинарт ажилтнуудаа оролцуулж ирсэн. Мөн гадаадын өндөр мэргэшсэн зөвлөхүүдийг урьж авчран ажилтнууддаа зөвлөгөө өгөх, сургалтыг тогтмол явуулж ирсэн билээ. Монголд жил бүр зохион байгуулагддаг олон улсын бетоны бага хурлыг ивээн тэтгэж үйл ажиллагааг нь дэмжиж, оролцож, гадаад дотоодын олон эрдэмтэн, мэргэжилтнүүдтэй санал солилцож тэдгээр мэргэжилтнүүдтэй гэрээ хийн хамтран ажиллаж ирсэн.

Ажилтнуудынхаа мэргэжил мэдлэгийг дээшлүүлэх зорилогоор Америк, ХБНГУ, Солонгос, Хятад зэрэг улсуудад явуулан бетоны үйлдвэр, лаборатори, дайрга хайрга, элсний үйлдвэрүүдтэй танилцуулан, сургалт авах ажлыг тогтмол хэрэгжүүлж байна.

Премиум Конкрит компани үйл ажиллагааныхаа бүхий л түвшинд Нийгмийн хариуцлагатай үйл ажиллагаа явуулахыг эрхэмлэдэг. Манай компани байгуулагдсан цагаасаа хойш шинийг эрэлхийлсэн, үр ашгийг нэмэгдүүлэх шинэ технологи нэвтрүүлэх, үйлдвэрлэлийн явцад ажилчдынхаа эрүүл мэнд болон байгаль орчны эрсдэлийг багасгахад чиглэсэн судалгаа шинжилгээ, бизнес хөгжлийн ажлуудыг тасралтгүй хийж байгаа ба эдгээр нь улам ихээр ховордож байгаа усны хэрэглээг багасгах, байгаль орчны бохирдлыг бууруулах, орон нутгийн ард иргэдийн итгэлийг олж бизнесийн үйл ажиллагаагаа саадгүй явуулах, зах зээлдээ тэргүүлэх байр сууриа урт удаан хугацаанд хадгалахад чиглэгддэг.

Уулын чулуу бутлан ангилах үйлдвэртээ экологийн аюулгүй нөхцлийг бүрдүүлэх үүднээс 300м.куб/цаг, 400м,куб/цаг хүчин чадалтай 2 ширхэг тоос сорогч суурилуулж, конусан бутлуурын аман дээр ус цацруулагч тавьснаар агаарт дэгдэж байгаа тоосонцрын хэмжээг 95% хүртэл багасган, ойр орчмын малын бэлчээрийг хамгаалах, үйлдвэрийн ажлын байрны эрүүл ахуйн нөхцлийг сайжруулж чадсан.

Дэгдэмхий үнсийг үйлдвэрлэлд ашигласнаар бетон үйлдвэрлэлд шаардагдах цементийн хэрэглээг бууруулж хүлэмжийн хийн ялгарлыг багасгаж байна. Үйлдвэрлэлд ашиглагдах 1 тонн дэгдэмхий үнсний хэрэглээ тутамд хүлэмжийн хийн ялгарал 0,9 тонн-оор буурдаг.